كبش المقبلي هرب !!

فجأة خرج الكبش حق المقبلي من حوش المنزل يجري زي الصاروخ تقول رياضي محترف في سباق الحواجز ومر من امامي في اتجاه الشارع الرئيسي ودخل بين السيارات والناس تجري وراه 

لحظه الا وخرج المقبلي وابنه يصيحوا امسكوا الكبش امسكوا الكبش ويجروا في نفس الاتجاه ..
وقفت اشاهد مايحدث امامي وانا اضحك على اللي حصل ..

عند تقاطع حافة القريشة ارتطم الكبش بسيارة وسقط ارضا والدماء تسيل من انفه ويفحر ..

وصل المقبلي الى موقع الاصطدام وشهق وصاح ايش مات.؟ فين الدريول حق البابور انا اشتي كبشي منه
قال الدريول : كبشك اجى الى فوق السيارة حقي وصدمنا والان شوف الصدام الامامي مكسر وانت باتصلحة والا باتشتري لي واحد جديد 

المقبلي قفز ومسكه وقال: عادك تشتي تعويض مني وانت دقيت الكبش تدخل الناس المتجمعين وقال احدهم : اول اذبحوا الكبش قبل مايموت وبعدين سدوا ..لفت المقبلي للكبش وقال : مالي دخل اشتي كبشي منك مخاطبا الدريول..

واحد قفز وقال : انا بااذبحة بس من بايدفع لي المشقاية قال واحد آخر : اول اذبحة وبعدين سهالة..
المقبلي صاح : لا احد يمسك الكبش حقي ودونا الشرطة قلت له : يامقبلي اعقل الكبش بايموت عليك اذبحه على الاقل تستفيد من لحمه والسائق مش غلطان كبشك كان يجري وصدم السيارة والناس كلهم يشهدوا لانهم شافوه هارب يجري وصدم السيارة وكسرها ..

قال : يعني كيف ياحاج خلاص راح الكبش وراحت فلوسي اشتريته ب ١٣٠ الف ريال دين من المؤسسة حقنا بايقسطوها علي شهريا..
قلت له : شل اللحم وخبيه في الثلاجة وعيد انت وجهالك بلا وجع قلب..

الناس كانوا يصيحوا الكبش بايموت اذبحوه وافق المقبلي واخدوا الكبش فوق الفوتبات وذبحه الرجل وفصل رأسه وقلت : لصاحب السيارة : خلاص ياابني انت توكل على الله وصلح بابورك  قال : يعني ادفع قيمة صدام جديد امرك لله انت وكبشك وشل نفسه ومشى ..

المقبلي كان مقهور وحزين على كبشه وقال : ذالحين من فين نجيب كهرباء للثلاجة والمخانيث يلصوها ساعتين ياعم خالد ؟؟ قلت له : صح كلامك بس اول خلصنا من الوقفه هنا وخلينا نرجع الحافة حملنا الكبش المذبوح فوق جاري ورجعنا الحافة الى بيت المقبلي 

وهناك قال الرجل اللي ذبح الكبش : شوفوا مشقايتي عشرة الف ريال حق الذباحة والرأس والكراعين لي ..
صاح المقبلي : امشي مشت بطنك قدك تشوفنا خسران وكبشي طار وانت تشتي عشرة الف ريال هيا خلي له حاله انا اعرف اذبح من نفسي قال الرجل : يعني بعدما ذبحته واطعفر الدم فوق ثيابي ماباتهبليش مشقاية..

تدخلت وقلت له : اسمع شوف الرجال حالته حاله انا بااعطيك من عندي خمسه الف ريال واذبحه مااعجبك توكل مع السلامة لا عاد تفعل لنا فيلم قد حالة عارنا حاله..
قال الرجل : خلاص موافق وامري لله فين نذبحه ؟
قال المقبلي : بانذبحه في الحوش بااجيب صحفه للحم وبالدي ماء وانت قول بسم الله وخلينا نخلص..

بدأت مراسيم الذبح وانا تركتهم ورجعت اجلس في الكرسي حقي امام العمارة وبصراحة اعجبنا الكبش فضل الانتحار على سجن المقبلي..

لقيت المقبلي العصر حنقان يسب ويشتم اصحاب الكهرباء لان فيوز قرح في الحافه وطفوا عليهم الكهرباء واضطر يرسل اللحم الى بيت صهره في المنصورة ليحفظوه في الثلاجة عندهم واذا الكهرباء عندهم في المنصورة زي عندنا قال بانوزعه على الاهل وبااجيب لك لحم نصيبك ياعم خالد..قلت له : ليش التعب تنقل اللحم من الشيخ للمنصورة والعودة وزعه الان احسن ضحك وقال : مكانك مستعجل خلاص بااروح المنصورة وبااجيب لك اللحم حقك بعد المغرب ولايهمك..

الفرحة فرحتنا ياحبايب فرحة كل قريب وبعيد ..كل عام وانتم بخير..
الحمدلله اكلنا لحم لما دوخنا..!!