حامد جعفر الحامد
-------------
فرشت لك قلبي ممشى و دعسـة ،،
دست على قلبي و دمي في هواك مسفـوح !!
ضعيت كل أحلامي ولا خليت لي فرصة ،،
أنت في مطرحك و أنا اليوم بـا أروح !!
خلاص القلب منك صار مجروح !!
كنت أتودد لك و أنت علي تقسـى ،،
عملت نفسك علي طحطــوح !!
تتبغدد علي في كل صبحة و ممسـى ،،
قطعت حبل الهوى ذي بيننا مشبـوح !!
خلاص القلب منك صار مجروح !!
-----
حياتي صارت كلها تعسـة ،،
مثل رقصـة طير مذبـوح !!
مرمرتني من نكسة إلى نكسة ،،
خذتني مقاولة من غير تسروح !!
خلاص القلب منك صار مجروح !!
و أنا صابر على المر ساكت ولا همسة ،،
ما بغيت سرنا بين النـاس مبيـوح !!
كلما تجاوزت نغصة جرعتنـي تلوها نغصة ،،
قلبك حجر يا خل من المحبة صار منزوح !!
خلاص القلب منك صار مجروح !!
-----
يعدي الليل وأنا قاهد ولا نعسـة ،،
أسامر آهاتي و حسرتي و النـوح !!
ضاع عمري و أنا منك ارتجي بسمة ،،
ما لقيت منك إلا عبـس مطفـوح !!
خلاص القلب منك صار مجروح !!
اسكت لا عاد تنطق بـحرف ولا كلمة ،،
لا تحاول بعد تعذبنـي ما بقـى في روح !!
غمستني في العذاب غمسة بعد غمسة ،،
لن أعود ولن أرجع لو يعلقونـي بـكندوح !!
خلاص القلب منك صار مجروح !!
ـــــــــــــــــــــــــــ
#حامد_جعفر_الحامد
عـــــــدن
الأثنين: 04 / 11 / 2024
