في العام 2010 كنا في ابين وكان الواحد يخرج ويحمد الله ان عاد الى البيت بسلام كانت عمليات تنظيم القاعدة قح بم يوميا الا وفي رقم مش معروف يتصل بي.
رديت عليه طلعت لهجته من حق المحافظات الشمالية. ونازل تهديدات.
اللي خلانا خذت التهديد على محمل الجد انه لما يتكلم يعرف عني اشياء كثيرة وين اسكن ووين اروح ووين اجي وحاجات كثيرة المهم اسبوع والتهديدات مستمرة. ايام عصيبة. جاب لي الزقاق.باقي قليل وقدنا ديك.
كلمت واحد بالموضوع قال جيب لي الرقم واشوف من صاحبه بعد نص ساعة جاب لي اسم صاحب الرقم طلع واحد معروف عامل لي مقلب.
اتصلت بصديق موجود قريب من صاحب الرقم قلت له القصة قال ايوه معه واحد صاحبه روفل واحد شرعبي. اكيد يخلي هو يكلمك.
طيب ذلحين بارويك الرد كيف، اتفقت مع واحد صديق نخزن نحن وهو يوميا. حبكت له فلم هندي خليته يتصل به اعرف نقطة ضعف هذا .الزلط
الفلم الهندي اللي كلمه به صديقي.
ان اخوه كان عسكري وجاب له اسم الوحدة العسكرية اللي كان فيها نفس الوحدة اللي فيها صاحب الشرعبي وان اخوة مات وحصلوا بعد مدة وصيه منه ان عنده وفي ذمته فلوس سلف من عام 93. تقدر بمية وعشرين ألف ريال
لواحد اسمه زي اسمك وفي معسكر كذا وجلسنا عشر سنين ندور عليك لما حصلنا رقمك أمس. ذلحين هو انت
قال ايوه انا طيب هل مبلغ الدين حقك 120 الف والا اكثر هذه ذمة ونشتي نبري ذمة اخونا
قال تقريبا 115 ألف بس قال له أتأكد بالله مانشتي خوي بتعذب رجع قال ايوه ايوه رجع بعدين شل مني خمسة الف.
خلاص نحن بكرة بانرسلها للكريمي .لاوين نرسلها لك.
قال لا عدن انا في عدن
خلاص بكرة الصباح بانرسلها للكريمي عدن
الرجال بكر من الصبح للكريمي في المعلا
ماشي حصل حواله
الا وقده يتصل رد عليه صاحبي قال له حولناها الكريمي بالشيخ عثمان قطب للشيخ عثمان. بعد ساعة وقده يتصل ان ماشي حصل حواله بالشيخ لحظة باتصل بالوليد اللي خليناه يحولها
كل شوي واتصل هاه ايش قال لكم ويقول له عاده رقمه خارج التغطية لاقد فتح قدنا باتصل عليك
وعليها كل شوي يتصل. ويكون الرد نفسه لغاية الساعة واحدة الكريمي قفل
بعد ماتأكدنا ان الكريمي قفل اتصل به صاحبي . العفو منك الولد ماحولها راح عند اخواله ونسي.
لكن العصر بايحولها على طول
ما وقعت الساعة اربع الا وهو يتصل من قدام الكريمي في الشيخ
قال له اسمع شف الولد قال بايحولها الكريمي كريتر.
وقطب صاحبنا لاكريتر..
واتصالات للساعة ثمان لما قفل الكريمي
وكل ساعة نجيب له عذر
سامحنا ياخي. لك اجر كبير على صبرك علينا .
لا لا ولاعليكم عادي عادي قد لي 15 سنة صابر.
اليوم الثاني بكر الكريمي كريتر الا وقده يتصل من هناك انه ماشي حصل حواله
رد عليه صاحبي ياخي سامحنا الولد هذا هبيلة
قال الان رايح يحولها عبر العروي للشيخ
صاحبنا برضه قطب للعروي للشيخ
الا وقده يتصل. ان ماحصل
ونجزع عليه اليوم الثاني كما الاول نخطط به من مكان بالعروي للساعة ثمان وهو لافهم ولايأس.
الساعة ثمان ونص بالليل جبت قصة جديدة لصاحبي قلت بانخليه يطمع في حاجة جديدة زوجة المرحوم
اتصل به وقال له ياخي اسمع شوف زوجة اخوي المرحوم اصرت انها هي تجيبها لا عندك .قالت لازم انا اوصل الفلوس لهذا الانسان المحترم اللي ما جاء يطالب بالفلوس حقه.
قال انته باتجي مع زوجة اخوك قال له لا لا باتجي لوحدها قالت ماشتي حد يروح معي.
قال اهلا وسهلا.. خلاص بانتظارها
لاوين تجيك . شفها باتبكر بدري الساعة سبع الا وقدها بعدن.
خلاص انا باكون الساعة سبع في انتظارها
في فرزة الهاشمي.
خلاص تمينا. اوبه تنام الساعة سبع وانته بالفرزة
قال عيب عليك ست ونص وانا بالهاشمي
الساعة سبع وقده يتصل من الهاشمي.
قال له. الباص عطل عليهم في الطريق وتأخروا.
الساعة 11 باتوصل للفرزة
الساعة 11 وصلنا فرزة الهاشمي وحصلناه جالس على كرتون جنب كشك
قد سلخته سلخ الشمس حق ثلاثة ايام
سلمت عليه هاه وش معك هنا
والله ارسلوا واحدة عجوز مريض من البلاد وقالوا لي انتظرهم هنا من شأن وديهم المستشفى
الله يعينك. خدمات والا شي
لا لا شكرا.
الى الساعة واحدة الظهر وهو يتصل بصاحبي ومايرد عليه.
اخر اتصال واحدة ونص اتصل ورديت عليه انا
هاه تشتي تلقط فلوس الايتام. وعادك تبا تهاوز زوجة المرحوم. ما كفتك الفلوس
قال تباها مقابل حق القاعدة ياكلب
اقسم بالله انها حقيقة وان عاد المهاوز حيا يرزق لليوم
صالح الحنشي
