كله تمام ( قصيدة)

بقلم/ مازن القصار

ما عاد أفك المكيف
البيت كله سقع
له تسع ساعات لاصي
ولا دقيقة هجع
ولا ألصي المضخة
المي لوحده طلع
ولا أخبي سعودي
قد له سنة ما ارتفع
والبيت مليان راشن
ما فيش معانا وسع
حتى اللبن قد قزلته
بالشهر أربع قصع
والنت يمشي حريقة
ما حد يهم السُرع
كل الشوارع سليمة
مافيش حفر أو رقع 
ولا برصدة مجاري
ولا بحافة خسع
اما المطار من جماله
تتخيله منتجع
أرقى مكان وتعامل
ما حد دخل واكتسع
وكل مرفق حكومي
يداوموا بالجُمع
يخارجوا الناس فيسع
ما حد بيوم التطع
والي معاهم موظف
أعطوه اربع بقع
وشبعنه حوافز
لما حسابه ارتصع
مافيش معه زام ثاني
بعد الدوام اكتبع
والشهر بالشهر راتب
ولا بمرة انقطع
والعرَس حاجة بسيطة
في كل يوم قُم بُقٓع
تلقى العريس مش معوٌل
عايش حياته دلع
يجهز العفش حقه
ما يوم ظهره افتصع
هذا الي قلته حقيفي
من وسط قلبي نبع
ما حد جبرنا أقوله
ولا لساني انتتع
والحمد لله ربي
ما لاح نجم وشع
ثم الصلاة على من
يوم القيامة شفع
أحمد رسول الهداية
الصادق المتبع
....
....
===========
الدكتور:
ودوا المريض المصحة
شكله جنانه رجع
لا كهرباء عقلنه
ولا علاجه نفع
قد كان هادئ مسالم
فجأة رجع له الصرٓع
--------