رئيس المجلس العزابي يروي واقعة اعتقاله واعضاء في المجلس

عدن ((عدن الغد)) خاص:

 

روى رئيس المجلس العزابي بعدن محمد ايهاب واقعة اعتقاله من قبل نقطة امنيه بمنطقة جولدمور بعدن.

وقال ايهاب ان قائد النقطة اوقفه لساعات بحجة انهم يحملون علم خاص بالمجلس العزابي الشبابي ويستقصدون اهانة الانتقالي.

واشار ايهاب الى ان قائد النقطة اخذ في سؤالهم عن اصولهم .

وشرح ايهاب الواقعة بالقول :" الموضوع طويل اتحملونا

ما حدث اليوم لنا انا والشباب والله شي يزعل من صدق

ويوم بعد يوم يثبتوا لنا حجم الشرخ والصدع اللي بيننا

وكل ماقلنا انه هذا الموضوع خلاص وانهم فهموا وما عاد

في التجاوزات ولا المواضيع اللي كنا نسمعها من الامن ضد

المواطنين الا انهم بكل مرة يثبتوا لنا العكس وانه المرحلة عاده طويلة

والموضوع بيتاخر.

المهم الموضوع وما فيه بغض النظر عن انه رحلة ما رحلة وذا الخبر

مننا خمسة اشخاص بسيارة ومعانا طربال ومخدات وسراجات ورايحين

البحر ومعانا علم فيبه شعار المجلس العزابي

وصلنا نقطة جولدمور اللي بعد النفق من اتجاه التواهي قبل مقر الرئاسة

حق المجلس الانتقالي الجنوبي وكان تقريباً قائد النقطة هو واقف بالمكان المهم شاف العلم سحبه من السيارة وفتحة وشاف مكتوب المجلس العزابي قال هااا انتو تهينوا المجلس الانتقالي جنب وانزلوا من السيارة وصيح للعسكر عشان يفتشوا المهم قلبوا السيارة فوق تحت

وقائد النقطة بدء يوجه الأسئلة ع واحد واحد من فين انت وجواب اي حد بعدن بيقول فين المنطقة اللي هو منه المهم صاحبي يقوله من الخور من العريش العسكري لالا من وين اصلك قاله ابين وع كذا يسال واحد واحد من وين اصلك المهم جلس يرسل بالجهاز ونحن منتظرين وخرج السامان اللي بالسيارة ع الرصيف ويقلبوها وهم ماسكين الكيمرا حق حسين الشرفي نحن وصلنا لقناعة انه ماعاد نشتي عاد نروح البحر

وخلاص بنروح وقلت له طيب خلاص ماعاد نشتي البحر بنرجع بيوتنا

قال لا اجلسوا ممنوع تتحركوا وجلسنا تقريبا من ساعة ونص الى ساعتين وبعدين قال خلاص اتحركوا دوروا بعد ماصور السيارة الف مرة

وصور جوازي ويمكن بطائق العيال

روحنا ونحن مصدومين ايش الخبر لفين وصلنا ايش اللي يشتوه بالضبط وليش متعمدين يوصلوا الناس لهذي المرحلة وليش يشتوا يخلونا نكرههم بالغصب زي ماقلت لك بغض النظر انه رحلة وما رحلة وانه ننسق عشان نجزع ونروح البحر مننا خمسة انفار مش 400

وهذا الموضوع والله متعمد ما درينا ايش الخبر هل له الموضوع علاقة ببيع الجزيرة ولا مجرد عناد وكبره وحقد وعقده

ونحن مش جهال عشان تضحكوا علينا باعتذار ومسامحه ومن ذا الخبر

جزعناها كثير ومرطناها لكن ذي المرة ما بتجزع

واحب اقول للكل انه في شباب بيخرجوا يحتجوا ع الاوضاع اللي بالبلاد والوضع الاقتصادي المتدهور وبرضة الامن بيخرج ضدهم وبيعترضهم وبيعتقل وبيضرب ومش بعيد يقتل كمان

جميع الاحزاب والقوى السياسية بالبلاد يختلفوا بكل شي لكن عند الفلوس والفساد يتفقوا

وبالاخير اشكر كل الشباب اللي اتواصلوا معنا واتطمنوا علينا والحمد لله الامور طيبة ورجعنا رحنا صيرة وجلسنا هناك نغير جو

واخص بالشكر الدكتور محمود بن جرادي مامور مديرية كريتر اللي كان يتواصل اول باول وجلسنا بكريتر معه وحاول يرطب الوضع وغيرنا جو

وكمان اخونا الصديق علي المحروق اللي سهل لنا امور إقامة الرحلة وكان معانا كمان اول باول لما وصله الخبر.

طولت كثير ادري بس الحرقة حق المعدة ما تخلينا اسكت

ومرة ثانية احب اشكر اصحابنا اللي تطمنوا علينا واتصلوا