خديجة الهكابة

عدن (عدن الغد) كتب خالد محمد شمسان

اجت لي واحدة الى مجلسي تحت العمارة وقالت : صباح الخير ياخالد ..
رديت عليها : صباح النور خير ان شاء الله اي خدمة؟ 
قالت : ايوه اجيت لك لما قرأت امس منشورك حق الهكبة..

قلت لها : اول من انت؟؟ 

قالت : او باتخليني واقفة وانت جالس تعال المشرب حق الشيباني نشرب حاجة ونهدر

 قلت لها : مله من انت؟؟

 قالت : الست خديجة بنت حافتكم الاوله زوجة المتوفي الحاج علي سعيد ..

قلت لها : عرفتك بس ايش تشتي مني؟؟ 
قالت : معي لك هكبة وانت الاول بس قم تعال خزيت بي بين الناس ..
قلت لها : يالله بسم الله مشينا

اثناء المشي الى مشرب الشيباني في الهاشمي قلت لها : والله عادك هدار اقوى مني ..

ضحكت وقالت : قل ماشاء الله وبعدين اني صغيرة مش من عقاتك .. 
ضحكت وقلت لها : خلاص انا شاب وانت شابه خلينا نوصل المطعم وبعدين بانهدر ..

قالت : بس عيني باردة عليك عادك ماشاءالله قوي وفيبك وسامة حق زمان ماراحتش

 سكت فرحان بكلامها الحلو ووصلنا المشرب ودخلنا مكان العائلات وهناك طلبنا عصائر وهي كشفت عن وجهها والحقيقة هي تشبه الرئيس السوداني جعفر النميري رحمه الله بس مازال فيها جمال وقوة الافريقيات محتفظة باناقتها ..

سالتها : ها ايش معك لي؟؟

قالت : اني عيوني لك وقدني اشتي اخدمك من زمان وانت الان قل لي ايش وكم تشتي؟؟

بصراحه قلبي فلت من العرض وقلت : محتاج هكبة الاول بخمسمائة الف ريال ..
قالت : بس كذا بكرة والفلوس عندك ياخلودي 

وضحكت وقالت : خلودي من قلبي مش زي ذيك اللي مثلت عليك..

ضحكت وقلت لها : اكيد تتابعي قصصي

 قالت : من فجر الله ابكر افتح صفحتك وايش جابني لك الا لما قرأت منشور الهكبة .. 
قلت : ذالحين كم باادفع بالشهر ؟؟ 
قالت : خمسه وعشرين الف ريال في الشهر ..
قلت : سدينا موافق ..
قالت : مله ماسألتنيش عن حالي وكيف عايشه ؟؟

قلت  : آسف من فرحتي نسيت أسألك..

ها كيف حالك بعد وفاة المرحوم ؟؟

 وبعدين انت كنتي تدرسي في التربية 

قالت : ايوه والان معي معاش وجالسة لوحدي بعد وفاة زوجي لانني ماخلفت اطفال 

قلت : ليش ماتزوجتي راجل يوقف جنبك ويحميك ..

 قالت : كثير تقدموا لي بس خفت انهم طامعين بالمعاش والبيت لكن لو في حد اثق فيبه واعرف انه جدع زيك بااتزوجه واني مطمئنه..

حسيت ان الحرمة اجت منمرة علي وبالنسبة لي هي طبعا كانت وفق الشروط بس قلت آخد نفس ومااستعجلش.. 
قلت لها : ماشاء الله عليك كل شىء حلو فيك وربنا بايكرمك بواحد يستاهلك.. 
قالت : وانت مش قلت ناوي تتزوج ؟؟
قلت : صحيح ...

 قالت : بغنج ودلال مله ايش تشتيني اني الحرمة اخطبك واقول اشتي اتزوجك مالك ياخلودي؟؟

قلت وانا محرج : ايوه صحيح وانا ماباحصلش احسن منك بس اعطينا فرصة ادبر نفسي انا محتاج البطارية والراشن وذالحين باتزيد مصاريف الزواج ..

 ضحكت وقالت : شوف اني علي حق الزواج خمسمائة الف ريال وبااعطيك مليون للبطارية والراشن والزواج

انا قشننت وقلت لها : مبدئيا اتفقنا بس هبيلي فرصة شهر افكر قالت : او شهر تفكر على ماهو واني قدني قدامك ومجهزة لك كل حاجة قول بصراحة ماتشتينش ..
قلت : الله المستعان  مش كذا اعطينا فرصة..
قالت : اسمع اسبوع كفاية وبااعطيك رقمي واتصل بي وقل ايوه موافق  والا ..لا ؟؟

وطلعت جوالها واخدت رقمي واتصلت رنه ليظهر رقمها عندي.. وقالت : كيف تمام ..
قلت لها : تمام..

 مدت لي بعشرة الف ريال قالت حاسب حق العصير واتغدي لك زربيان وافتهن ودفعت الحساب وخرجنا هي راحت حافتهم  وانا رجعت للكرسي حقي افسر كيف اسوي ؟؟