صالحونا بحبة دجاج

صليت الفجر اليوم وقررت اروح البيت ساني مش علشان انفذ تعليمات الحرمة.. لا ..
بس لاننا قررت انام قليل لاننا معي فحوصات لابد من عملها الساعة عشرة صباحا وبعدين الجلسة مع شيوبة مخرفين مامنها الا المشاكل..

وانا تحت العمارة لفت الا والسيد صالح امامي هو وابنه يرحب بي قائلا : اهلا بأخي خالد الطيب سامحنا انا فدالك يابن شمسان قالوا الشاهي اجا فوقك..
قلت له : قالوا ياصالح كان باقي القلص ماوصل الى رأسي لو وصل فاتنا في الانعاش من بعدكم..
قال : والله زعلت عليك وامانتك تسامحنا قد الحاج سالم اجانا البيت أمس واتسامحنا واتغدينا سوى شيطان دخل بيننا..

صحت : الله..الله سديتم واتغديتم ماشاء الله وانتم ولافيبكم حاجة وانا اللي حرقنا الشاهي ووسخ ثيابي ولا احد غدانا ولاوسأل علي..
هيا خلاص اتوكل لك والمقهاية بطلت اجلس فيها..

ابنه ضحك وقال : ياعم خالد قد الوالد من امس وهو زعلان عليك وكان يشتي يجي لك بعد العشاء وقلنا له الصباح احسن وانت تعرفه نظره ركيك..
قلت : نظره ركيك هاها..ذا قناص رهيب قنصنا بالشاهي ووسخ ثيابي وحرقنا ..

قال السيد صالح : خلي قلبك ابيض قدك انت ملح الجلسة وتعال نشرب شاهي ومالك من عاره الحاج سالم مناجم ولسانه طويل ..
اسمع ثياب العيد على حسابي وحبه دجاج من المحل بايجيبها لك فؤاد ابني للبيت اليوم..
هيا امشي معي نشرب شاهي ونأكل حبيتن خمير ..

قلت : والله انا سامحتك في نفس اللحظة ويعلم الله هذا لكن انت بطل القنفزة ورمي القلاصات فوق الناس ضحك وقال : بطلت الكلام في السياسة نهائيا..

رحنا المقهى الا وسالم جالس على الطاوله قلت له : رجاء ياسالم اجلس سكته خلينا نشرب شاهي وبطل المناجمة قال وهو يضحك : مله فهم صاحبك يبطل السياسة..

قفز صالح وقال : شوف مكانه كلامك يقبص تشتينا نعمل زي امس..
صحت وقلت : باتعقلوا والا بااعرعر لكم الاثنين وبااسيب المقهاية لكم وللجن ..
ضحكا الاثنان وقال سالم : ياعاقل نمزح معك..

شربت الشاهي مع فتوات الشيخ عثمان وغادرت واثناء مغادرتي صاح السيد صالح ابو الدجاج : خلاص زي مااتفقنا بايجيك فؤاد بعدين مع الموضوع..
فهمت ان المقصود هو الدجاجة وثياب العيد..

دخلت البيت نافش ريشي تقول ديك شركسي وقلت للحرمة : رامبو كسب دجاجة اليوم وثياب العيد من السيد صالح مصالحة على الطفشه حق امس ..
قالت وهي تضحك : متى حصل هذا ؟
قلت : الان في المقهاية ردت بسرعة : على كذا خليهم يطفشوك كل يوم واني ماعزك بااصبن لك مادام فيها ثياب ودجاج..

شفتوا كيف الحريم كلهم اصحاب مصالح تشتيهم بيطفشونا بالشاهي يوميا علشان حبة دجاجة وشوية ثياب..!!