نزلت كعادتي صباح كل يوم الى مجلسي تحت العمارة وانا اغني "اول مرة تحب ياقلبي واول يوم اتهنا ياما على نار الحب قالوا ولقيتها من الجنه"
وعادنا الا جلست الا والجوال رن بصوت مزعج ربشنا شفت الرقم لقيته حق خديجة الهكابة قلت ياحاج رد عليها وانهي الموضوع ..
وفعلا فتحت المكالمة وقلت : السلام عليكم..
وردت : وعليكم السلام خلودي مالك فينك اعمل رنات ومااتصلت ..
قلت لها : مشغول وعندي مشاكل بسببك.. قالت : او بسببي ليش ايش فعلت اني؟؟ قلت لها : العالم كله عرف بموضوع زواجنا وواجهت مشاكل جابت لي الجنان..
قالت : اسمع اني قريب من المشرب تعال نتكلم ..
قلت : نتكلم على ايش؟؟ بطلت الزواج والهكبة..
قالت : طيب تعال نتفاهم قلت : بااجي بس خمس دقائق وننهي الموضوع..
دخلت المشرب واول ماجلست قلت لها : شوفي ياخديجة الزواج قسمة ونصيب وانا رجل كبير في السن مش حق زواج وانت مازلت صغيرة تقدري تتزوجي احسن مني.. قالت : هكذا !!
قلت : انا مااشتيش مشاكل ووجع قلب في هذا العمر ..
قالت بعصبية : حتى اني نصحوني اهلي واصدقائي وخلاني وقالوا لي : شيبه قد رجوله مدندلين بالقبر مو شتعملي بوه باتجلسي ياهبله تخدميه لما يقندل ولا معك فائدة غير التعب ووجع القلب ..
قلت لها : نقصي صوتك ومافيش داعي لطولة اللسان واللكاعة خلاص الموضوع منتهي والزواج قسمة ونصيب ..
قالت : لا ابه الموضوع ماانتهاش رجع لي العشرة الف اللي هبيتها لك في المشرب قلت : حاضر بكرة اجزعي الحافة شليها ياخديجة..
خلاص انتهينا ..
قالت : احسن وصلت لحد هنا وماعطيتكم الهكبة..
قلت : مله بس فحستينا فحس وكله من شأن الزواج هيا مع السلامة ..
قالت : ايش من زواج مو عسى الله كنت بااتزوج فتحي بن لزرق اسمع بكرة جهز فلوسي وفحط لك..
تركت الاخت جعفر النميري ومشيت ايش ذا الجنان حبني وتزوجني بالغصب مع ان المغنية غنت المحبة بالرضى مش بالحتامة ماتجيش بالزجى او بالملامة..
رجعت الى مجلسي سالما غانما وجلست علي الكرسي..
وقلت في نفسي : الحمدلله نجانا الله من خديجة الهكابة كيف لو تزوجتها؟؟
كانت باتشتغلنا شغل عاد بعض اصحابي سكوا على يابختك وهذه هدية اجت لك من السماء..دق وعاد الحديد حامي
دي مصيبة كانت باتسقط على رأسي وباتكسرنا ..
ذالحين لازم ادبر لها العشرة الف حقها والا باتشمت بي شمات ومامعي الا عوض المدكن خاف يحن قلبه علي ويساعدنا ويعطينا المبلغ ..
مديت رجولي ودندنت ..
اعطني حريتي اطلق يديا
انني اعطيت مااستبقيت شيئا
هيا خاطركم ..!!
