صاروخ باليستي ماقرحش

بعد وساطات واتصالات وفي اليوم المحدد ركبت بابور انجيز ورحت الى مبنى اللجنة لمقابلة لجنة المساعدات المادية والعينية حتى استلم الدعم المالي والراشن زيما قال لي فؤاد علي سالم صاحبي..

وصلت الى المبني فجرا بعدما ان صليت واكلت مقصقص مع الشاهي في المقهاية وكان معي حفيدي ..كان المنظر مخيفا من عدد البشر رجالا ونساءا الذين وصلوا قبلي ولكنني لم اقلق لان وساطتي قوية من النوع الذي تخترق كل شيء ..

جلست هادئا بعيدا عن الناس منتظر عضو اللجنة عمر الذي كلمه صاحبي عني مر الوقت وعمر مختفي وبدأت اقلق تقدمت الى واحد من الحراسة وقلت له : كيف حالك ياابني رد علي : تمام ياحاج بس ارجع وراء لما يجي دورك ..

قلت له : عمر داخل ..

قال لي : من عمر ؟؟

قلت : او كيف ماتعرفش عمر ذا المسؤول حق اللجنة ..

قال : ولا اعرف احد ارجع ياحاج لاتسوي لي مشاكل..

كمحاولة اخيرة ليلين قلبه ويدخلنا قلت له : ولايهمك باارجع وراء انت تأمر بس اصلا انا مشبه فيبك انت من الشيخ..؟؟

قال : ايوه خلاص يا.حاج توكل.. قلت : مالك معصب مش انت ابن محمد الزغير اللي بحافة القريشة ..

قال : لا ياحاج خلاص ارجع وراء ..قلت : طيب بانرجع ريوس اسمع اجيب لك قارورة ماء شملان شكلك ترشح ..

قال : مشكور هيا مع السلامة قلت : طيب وعمر كيف اوصل له ..قال : سجلت في الكشف مع الناس ..قلت : ايوه الفجر سجلت.. قال : هيا اجلس لما يصيحوا باسمك ادخل ..

قلت : احسبك باتساعدنا في الدخول هيا بااجلس هناك وانت انتبه لما يصيحوا خالد شمسان بلغنا انا قليل مااسمع قال : ولايهمك انت توكل وروح اجلس هناك وبعدين سهل..

رجعت للخلف وجلست اتشوه مع الشيوبة بعد ساعتين اجى حفيدي يصيح : ياجدو..ياجدو قم فيسع صيحوا باسمك..

قمت واخترقت الجموع الغفيرة وبعد مناتعة ومناصلة دخلت ووقفت اما اللجنة كانوا ثلاثة رجال وبنتان وكنت في حوشه مااعرف من منهم عمر وكان قبلي جالسين ثلاثة رجال وامرأتان وفجأة قام واحد وسمعت عضو اللجنة يقول لي : اجلس ياحاج..

جلست .. قال : لي فين ملفك قلت له : ايش من ملف مااحد كلمنا اجيب ملف فين عمر ؟؟ قال : عمر من ؟

قلت له : صاحبكم في اللجنة قال : انسحب من اللجنة

قلت : انسحب على كيف وصاحبي العميد ركن قائد معسكر الصورايخ البالستية صالح علي كلمه امس عني..

ضحك وقال : ايش جاب الصواريخ البالستية ياحاج هات ملفك علشان نخارجك قلت : ذالحين انت من صدقك ان عمر انسحب ..

ضحك وقال : والله انه فعلا انسحب قبل شهر ...

وعلى الفور قلت : وانا كمان منسحب ..

قال : ليش مالك،؟ ياالله وانك وصلت كيف تنسحب ..

قلت له : يبان لعبوا علي صاحب الصواريخ البالستية وصاحبي اللي اتوسط شلوا فلوسي وخزنوا وافتهنوا وخلونا اداهف واتعب على فاشوش وكسرت النظارة حقي وضيعت مفاتيح البيت..

قال : ليش ايش قالوا لك ؟؟

قالوا لي انت روح لعمر وابصم وشل الراشن والفلوس وروح قد نحنا متفاهمين معاه..

قال : كذبوا عليك ذلحين اسمع بااكتب لك ايش المطلوب وتعال مرة ثاني الى عندي ولايهمك ..

قلت له : انتم مكة وانا سعيد اليهودي ماباجيش توبة..

قمت وانسحبت خرجت من الغرفةوداهفت بين البشر حتى وصلت الشارع انا وحفيدنا وركبت انجيز ساني الى بيت فؤاد علي سالم الوسيط ..

خليت حفيدي يدق الباب ويصيح له خرج مهري يقول : مرحبا بالعاقل ها كيف بونت اعطوك الفلوس والراشن

قلت : شوف معك فرصة عشر دقائق تدخل بيتكم وتجيب فلوسي والا بااشمت بك شمات وبااخلي امة لا اله الا الله تتفرج علينا ..

قال : مالك  ايش استوى ؟؟ قلت : صاحبك العميد الركن اطلق صاروخ باليستي وماقرحش وعمر طردوه من اللجنة وانا تعبت واتبهدلت وكسرت النظارة وضيعت المفاتيح حق البيت لاننا سمعت كلامك..

جيب الفلوس وخارجنا سريع يافؤاد شوف الضغط حقي ارتفع لما السماء ..

قال : طيب انت الان معصب تعبان روح البيت وبعد قليل بااجيب الفلوس لما عندك قلت : خلاص بااروح وبانتظرك انتبه تلعب علي باتستوي بيننا مشاكل خلينا اصحاب وجيب فلوسي ..

روحت للبيت حالتي حاله ومقهور قهر من العميد الركن صاحب الصواريخ الباليسية اللي اكل علينا عشرة الف ريال ولاضرب صاروخ..!!