ملجأ العجزة

كنت جهزت نفسي للانتقال للعيش في ملجأ العجزة حيث الهدوء والسكينة لا قضي ما تبقى لي من العمر هناك بعيدا منغصات الحياة التي ارهقتنا وهو بالمناسبة مبنى جديد من ثلاثة طوابق مع ملحقاتها ويقع بين الخط الفاصل بين السيلة وكود العثماني وهو غير دار المسنين في الشيخ عثمان وبالفعل توكلت على الله وذهبت انا وصاحبي عبدالله حسين ابوبكر للملجأ ومعي شنطة ثيابي 

في السيارة قلت لعبدالله : تعرف حد في الملجأ ؟ 

قال : اعرف المسؤول الاداري حقهم .. 

قلت له : خير يبان باننجح ويقبلونا عندهم..

وصلنا الملجأ وبحثنا عن صاحب عبدالله المسؤول الاداري قالوا مابايجيش امه مريضة ووداها المستشفى..

قلت في نفسي والله هذا فأل سيء ..قال عبدالله : امشي باندخل للمشرفة وان شاء الله توافق عسى الله مو باتدخلك الجامعة؟ 

قلت له : ياعبدالله هنا الامور مزرزرة .. قال : تعال معي ندخل عندها وبالباقي سهل 

دخلنا غرفة الانتظار ولما جاء دورنا دخلنا عبدالله امامي وانا خلفه امشي دلا دلا بالعصا علشان ترحمنا وتقبلنا عريسا قصدي نزيلا عندهم ..

بعد السلام جلسنا وتكلم عبدالله وقال : معنا العاقل خالد نشتي ندخله الملجأ عندكم رجل كبير في السن وتعبان ويحتاج رعاية وعناية..

تلفتت وقالت : فين الحاج ؟ قفزت وقلت لها : انا..انا الحاج خالد ..

قالت : مش معقول لايمكن نقبلك عندنا انت ماشاء الله صحتك حديد وصغير في السن.. 

قلت لها : صلي على النبي باتمرعينا وباتكملي باقيتي شوفي انا البودي حقي مليح بس المكينة تعبانة وانا احتاج عناية ورعاية كما قال الاستاذ عبدالله ..

قالت : انت ولا فيبك حاجة ونحن مش فندق من صنف جاب شنطته واجي يشتي يسكن هنا ملجأ العجزة والدخول فيه بشروط وانت لاينطبق عليك شرط واحد..

انا آسفة مااقدر اقبلك ليش ماتدور لك وساطة عند الانتقالي يسجلوك عسكري آكل شارب وفوقها الف ريال سعودي وقدها كلها ملاجئ ..

لفت للعونطي عبدالله اللي مكنا ولايهمك انت اسكت وانا بااتكلم ولا لك الا تسكن في الملجأ وقلت له : ها كيف تشوف ياعبدالله ؟؟ 

قال لها : يعني مافيش أمل ؟ 

قالت له : انتم اجيتم للمكان الخطأ رجعه بيتهم وحل مشاكله والأمور ستكون طيبة.. ووقفت وقالت مع السلامة..

انا من الصدمة ماقدرت اوقف ساعدنا عبدالله على الوقوف وقلت لها : يعني مافيش أمل هزت رأسها بلا .. 

وقالت مع السلامة ..

خرجنا وانا مسوم وحالتي حاله وعبدالله يقول : مالك منها بااجيب لك توصية من المحافظ وباتقبلك بالغصب

قلت له : بس سكه لك من المحافظ اللي عمره مامشى له قرار ودينا مطعم نفطر اجيت جيعان قلت باافطر في الملجأ كبده وروتي وشاهي ملبن ..

ضحك وقال : على خبيث اجيت منمر عليهم تدور اكل ضحكنا وروحنا الى الحافة واكلنا روتي وفول في مطعم الشيباني..

رجعت البيت وعادنا الا دخلت الا والحرمة فرحانة تزغرد تقول اننا نجحت في الثانوية العامة واجيت من الاوائل.. واحفادي حلقوا بي ..

وقالت لي : والله انني كنت ادعي الله مايقبلوك في الملجأ قلت لها : هكذا..والله انك مصيبة ..

وعادنا الا جلست الا وقالت : ابنك ماجابش صيد نعم غالي والراشن قده مكمل والماء ماطلعش اليوم صحت..

وقلت : لعلمكم بكرة بااروح سجن المنصورة خاف يقبلونا ودخلت غرفتي وطبقت الباب ونمت..!!