آخر تحديث :الخميس-28 مارس 2024-02:47م

أخبار عدن


انا والمشاكل دائما حبايب

الخميس - 21 يناير 2021 - 02:00 ص بتوقيت عدن

انا والمشاكل دائما حبايب

عدن (عدن الغد) خاص

كتب /خالد محمد شمسان 

قالت الحجة : ذلحين انت من صدقك قاطعت ابراهيم صاحبك وجارك وبينكم عشرة طويله.. قلت لها : مالك دخل له حاله هذا معقلة ويكرهنا..

صاحت : يارجال استحي على نفسك قده ماباقي معك صاحب الا هذا وكمان قاطعته.
قلت لها : ابراهيم تغير ودائما يوقف مع الاعداء ضدي..

قالت : او..ايش من اعداء مو قدك في حرب تخوض المعارك هيا بطل لك هذه الهدرة وروح الان سد معه واتسامح منه..
قلت : ذي الساعة ليل خلي السدية بكرة..
قالت : عادها الساعة تسع وهو والف يسمر ومايرقد بحين زيك..
قلت : خلاص طيب بااروح الان اصالحه يامعقله..

دقيت الباب وصيحت حامي ياابراهييييم..فك الباب.. فتح الباب وقال : ها ايش قد معك ايش قد صايحت الحجة؟؟
قلت له : خاف الله انت ايش من بني آدم تدور حرش ومشاكل..
قال : اصلك انت ماتقر ولاتستقر الا لما تعمل فوضى..طيب ايش في؟
قلت : سامحنا امس زعلت فوقك اصلا انت دائما توقف ضدي..
قال : مسامح بس انت اهدأ لاتتعصب وتسوي لنا كل يوم قصة..
سدينا وانتهت الازمة..

رجعت البيت وقلت للحجة : والله اننا مسكت نفسي والا بااهبله حقه يقول اننا صاحب مشاكل وعصبي..
قالت : خلاص ارقد لك .. الحمدلله انكم سديتم ..

في اليوم الثاني بعد صلاة الفجر ذهبنا انا وابرهيم والحاج صالح والاستاذ فؤاد علي سالم الى مطعم ومقهاية الشيباني اشتريت خمير وزكنت واحد شاهي وشفت ابراهيم معه قرص روتي حاف ياكله على الشاهي لفت الى عندي وقال : بطال هذا اللي تاكله مقصقص كله صليط هذا خطر على صحتك ..
قلت : قدنا والف اكل هذا ولافيبي حاجة
قال : شوف سع منك سمين وتشتكي من ركبك وعندك القلب باتموت ياخالد وباتتعب اللي بايحملوا المجنز حقك
وضحك وضحك معه الحاج صالح والاستاذ فؤاد ..

انا زعلت وقلت : اولا مالك دخل بآكل اللي اشتي وبعدين يافصيح لاتحمل المجنز حقي الله يخلي الحانوتي حق مسجد الهاشمي بايغسلنا وباينقلنا بسيارة الموتي ربع ساعة وانا في الحفرة مرتاح..
بس انت لاتتعذر لانك اصلا بخيل وتخاف على الفلوس لهذا ماتاكل زي الناس وجزعته روتي حاف مع الشاهي يارشيق ..
رد بسرعة وقال : انا معي فلوس بادفنك فيها وانت اصلا تكره اللي ينصحك..
قلت : ها معك فلوس وانا طلبت منك قبل اسبوع سلف عشره الف ريال وحلفت يمين انك طفران ايش من جار انت؟

قال : يااخي انا حر بفلوسي وانا نصحتك نصيحة وانت تشتي مشاكل..
قال الاستاذ فؤاد : اغضبوا الشيطان واسكتوا وخلونا نهدأ..
قلت : هذا فاعل نفسه فشفشي يعرف كل شيء ايش دخله فيبي آكل خمير والا حطب ماله دخل..وبعدين هذا مراع والا ايش معناتو مركز علي ويقول اننا سمين..

قال ابراهيم : يااخي ابعد مني لاتمشي معي وكل واحد يروح لحاله..
قلت : ها ها نعم رجعت لي عيدروس الزبيدي والا هاني ابوجلمبو .. يااخي طير لك من قدامي ..
قال الاستاذ فؤاد : تعال ياابراهيم معي ومافيش داعي للمشاكل..
قاموا كلهم وانسحبوا وانا كملت الخميرحقي والشاهي وروحت..

شفتوا كيف هاذونا الناس مؤذيين ماخلوا لي حالي يكرهونا وبالذات ابراهيم هذا ..
لكن خلاص توبه امشي معه..
هو مكة وانا سعيد اليهودي..!!