متى يا " أبين " متى باتكملي العِده ..

دخلت " أبين " ونا لي منها مُدَّه 

وشفت الحال فيها لايريح الحال
صويَّه موليه مارود

وشفت الجرح فيها سال بالمده
ونكَّدها وكلكل كبدها كلكال
وخايف لا يكلها الدود

تصيَّح في الملا النجَّدة النجَّدة
ولا حد جارها أو حطها في البال
ولا اتحقق لها مقصود

ولا حد في المصيبة مدَّها يدَّه
رموها كلهم في سلة الإهمال
وهي بنت الكرم والجود

وشفت عيالها كلين في حدَّه
على الورثه تعادوا وقطبوا لحبال
ضحايا النار والبارود

عيال ابليس كل ليلة يسوو هدَّه
يشب النار فيها لعور الدجال
وذا شارد وذا مفقود

متى يا " أبين " متى باتكملي العده
وباتتكحلي يازينة الأسبال
وباتتبخري بالعود

وباتتعطري من عطر بوهندَّه
وباتتلبسي المخمل مع الدسمال
وباترمي الثياب السود

وقالت لي تنشادك بلغ حده
كفى لاعاد تتألل علي إئلال
ولا تنشد بلا منشود

أنا ابتالي اهونوا كلين من عنده
خراب الطين لاقد هونوا لبتال
يعصورها هبوب النود

ولكن موسمي لاقد زجم رعده
ولعلع بارقة وارخى وسيله سال
على عدّّانها باعود

وبيجي الفارس المقدام في وعده
وباتسمع صهيل الخيل للخيَّال
لجام المهره المشدود

ولا جا بايسل السيف من غمده
وبيمشعها وبيحنجل بها حنجال
وبايسقي سنان امعود

حرام ان ماوفي ابني فسخ عقده
وبايصبح من الحسبة بلا مثقال
ولا باعد به معدود