صحافة ساخرة : #حكاية_ناجي_وعامر

المشهد الأول : صيف العام 1993

في الـ 5 من فبراير 1992 التقيا عامر العدني وناجي الصنعاني في العاصمة المصرية حيث كانا يدرسان هناك على حساب الحكومة ونشأت علاقة صداقة بينهما .

وعادا بعد سنوات كلا إلى مدينته ، في مايو  1993 اتصل ناجي على هاتف البيت حق عامر ودردشوا وسألوا عن حال بعض .

قال "ناجي" لعامر :" ايش رأيك يا أخي تطلع صنعاء وتغير جو عندنا.

لمعت الفكرة برأس صاحبنا العدني وبعد يومين إلا وقده طالع نقيل يسلح بسيارته المازدا .

التقى الصديقان بميدان التحرير وجلسا على ناصية مقهى هناك ليشربا شاي قبل ان يذهبا إلى منزل "ناجي".

رحب ناجي بصديقه العدني وبدأ بسؤاله عن الرحلة ومتاعبها.

 ودار الحوار التالي :

ناجي الصنعاني : حيّا الله من جانا و أهلا وسهلا بين اهلك و أصحابك فوق عيني و راسي .. قل لي كف كانت الرحلة معك؟

عامر : والله ياخي خليها على الله ايش دي النقاط على طول الخط كل شوية يركنونا ويطلبوا يشوفوا البطاقة وبعدين يقولك حق النقطة ايش دا الوضع الله يعينكم.

يطلق ناجي ضحكة ويرد قائلا :" سهل سهل يا أخي دعمم بس و مع الوقت عتتعود و لا عد تحس بشي.

عامر :" ايش دعمم دي ؟

يحك ناجي رأسه :" يعني لاتكبر الموضوع بتتعود لو عشت هانا .

عامر :" ياخي لا مش معقول كل نقطة تطلب 50 ريال أمانة إني خسران يجي 500 ريال من عدن إلى صنعاء وكل ماشافوا البطاقة إني من عدن قالوا على جنب .

ينظر عامر إلى ناجي ويبادره بالسؤال :" أنت ايش أخبارك ياجني والله لك وحشة ..

ناجي :" خليها على ربك،  الحمد لله جالسين نلاحق بعد رزقنا ملاحقة بس ربك كريم  ..

عامر :" ايوه ايش تشتغل يعني؟

ناجي :" من بعدما تخرجت من الكلية بمصر و انا أدور عمل و لا لقيت بعدها رجعت اتعسكرت مع الشيخ "مجاهد الحاشدي" بخط المطار..

ينظر عامر باستغراب ناحية صديقه ويرتشف رشفة من كوب الشاي الذي أمامه :" ايش ايش كيف تعسكرت مع شيخ وأنت خريج هندسة اتصالات ..

يضحك ناجي مجددا :" ياعامر نحمد الله على  الحاصل و لا بغير شي ... الشيخ مجاهد صرفوا له كتيبة قريب المطار وعسكرنا معه .

عامر :" طيب وهذا مجاهد والكتيبة حقكم تبع من ؟ حرس جمهوري -شرطة عسكرية - امن عام - جيش ؟ ايش بالضبط؟

ناجي :" ياخي ولا تتبع حد ، هذي تبع الفندم مجاهد وكل يوم جالس يبسط على أراضي خلق الله يا سعم يحرسها ولا يتبلطج عليها و هكذا مسبر أموره و لا حد بيحاكيه ..

عامر :" ايش هذا والله مافيش دولة ونحن نسمع في الأخبار الجمهورية الجمهورية فين الدولة ياناجي..

ناجي :" هيا اسمعني ما دام ناوي تجلس معنا في صنعاء و أكيد بتخارجك و تنفعك..

عامر :" تفضل انا افدى لك شكلنا دخلنا غابة مش مدينة ..

ناجي :" النصيحة الأولى : إذا خطيت بسيارتك وشفت موكب مسؤول او شيخ او قائد حاول تجنب على جنب لاما يريحوا لهم بعيد منك و لا بيشخطوا من فوقك غصب و لو سمعوا لك نخس بينزلوا المرافقين يضربوك و يدعسوا على لقفك و ممكن يطلقوا عليك الرصاص لو زِد راددتهم ..!

عامر :" ياساتر  ايش دا مالك صلي عالنبي؟

ناجي :" والنصيحة الثانية اذا وقعت في مشكلة لا تسير القسم لأنهم ما بلا يتهبشوك و ينهبوا ما معك و مش بعيد يرجموك داخل السجن لاما يبان لك صاحب .. فحل مشاكلك بهدوء و خارج نفسك عبر شيخ او فندم تعرفه احسن لك.

عامر يرشف رشفة من كوب الشاي :" ايوه كمل كمل.

والنصيحة الثالثة :" لاتظهرش للناس انك من عدن لانهم ما بلا يستغلوك ..

عامر :" اهااا هيا اسمع حرام طلاق ما اجلس دقيقة في هذه الغابة .. ايش من مدينة ياخي ..

ينطلق عامر صوب سيارته ويقرع السويس ويفحط صوب عدن.

المشهد الثاني شتاء العام 2018..

عامر يقف في نقطة أمنية مرتديا ثياب الحزام الامني ، الساعة الثامنة مساء ، قبل قليل نجع القات وجالس يشرب شاي من علبة حليب الممتاز ويأشر بيده للسيارات تمر ، يبان من عيونه انه قده طافح من روحه.

عامر هو الاخير خريج اتصالات لكنه تعسكر مؤخرا تبع واحد من قيادات المقاومة بالحزام.

يرن تلفون "عامر" ويظهر في الشاشة "ناجي الصنعاني" يتصل بك..

- الو الو أهلا ناجي كيف حالك؟

- ياخي فينك انا بعدن ياخي وتمرطمت إلى ان دخلت والان داخل عدن ضروري اشوفك ..

- على طول .. لاقينا إلى جولة الكراع باكون هناك.

بعد ساعة كان عامر في استقبال ناجي الذي قدم على متن سيارته الخاصة، تبادلا الاحضان والقبل.

طلع "عامر" إلى جانب ناجي بالسيارة ..

- ناجي : ايش أخبارك يا أخي والله لك وحشة ولا عاد التقينا من زيارتي الاخيرة لعدن قبل الحرب.

عامر  يضحك ويشير بيده ناحية الدريس الذي يلبسه ويقول :" ياخي زي ماتشوف نتقلَب أخي ناجي

ناجي :" ايش هذا اللبس الغريب ؟ وفين تشتغل ؟

عامر :" اخوك عسكري في الحزام الامني تبع ابو نضال الجنوبي ..

ناجي :" و ايشو هذا الحزام الامني .. ! تبع منو و ما بيفعل و منو هذا ابو نضال ..؟

يضحك عامر بشدة ويخبط :" هيا تتذكر الشيخ مجاهد وكتيبة المطار هيا شوفنا زيه بالضبط معنا كتيبة اسمها "الابطال" وكل يوم نداهم ارضية ولا نهد حوش لصالح ابو نضال ..

- ناجي :" ايش تقول ياعامر مش معقول ذيه الخبر  و احنا كل يوم نسمع ان عدن فيها دولة ونظام ..

عامر :" لا والله يا أخي شفها كتيبة الشيخ مجاهد بس  نقلوها الى عدن وسموها الحزام الامني.. إلا قلي كيف الطريق من صنعاء؟.

ناجي : والله ياعامر خليها على الله قتلونا قتل فـ الطريق و كلما خطينا من نقطة اشتي ادفع لهم الف ريال رغم إني ارويهم التقرير الطبي أذي معي بس كل ماشافوا البطاقة من صنعاء شلوا مني الف و إلا الفين حق الطريق..

عامر بلهجة خجولة :" خليها على الله تعبونا كلنا ..إلا اسمع طالما وقد وصلت عدن خلينا اهب لك نصايح تنفعك.

ناجي :" هات يا بي هات .. شكله يوم جن من اوله  ..

عامر :" شوف ياصاحبي النصيحة الاولى : اذا مشيت بسيارتك وشفت موكب مسئول امني او قيادي في المقاومة حاول تجنب على جنب إلى ان يمروا ولاشوفهم بايمطوك لابعيد ويمكن يطلقوا الرصاص عليك اذا قربت من الموكب، اليوم ضربوا لك سيارة  واحد بالبريقة خليها على الله ..

ناجي  :" ياساتر  ماهو ذيه الكلام مالك صلي عالنبي ذكرتني بالي قلته لك عن صنعاء زمان؟

عامر  :" والنصيحة الثانية اذا استوت لك مشكلة لاتروحش أي قسم بتلاقي ملاعين ينهبوك ويسرقوك ويمكن يلفقون لك تهمة ويقولوا حوثي  واي مشكلة تواجهك هنا حاول تحلها بهدوء او تحاول تشوف لك أي قايد مقاومة او مسئول هب له الحاصل وبييخارجك بلا شرط بلا جن .

ناجي  يبحث عن دبة الماء الشملان و يشرب منها شربة والعرق يتصبب من جبينه :" ايوه .. كمل كمل.

والنصيحة الثالثة :" لاتظهرش لاي نقطة  هنا انك من صنعاء لانهم بيستغلونك وممكن يحملوا لك السيارة متفجرات ويعملوا لك فيلم من حق الرجال ..

ناجي :"اسالك بالله منك صدق ..!

ذحين احنا بصنعاء 1993 ولا بعدن ٢٠١٨م ..

 اهااا هيا اسمع حرام طلاق ما اجلس دقيقة في هذه الغابة .. ايش من مدينة ياخي ..

يدير ناجي مقود السيارة صوب لحج ويقول لعامر :" هيا خاطرك حرام و طلاق ما اجلس دقيقة هانا ..

بين مشهدين الاول في العام 1993 والثاني في 2018 تتشابهان صنعاء وعدن ..

#فتحي_بن_لزرق

17 ديسمبر 2018