آخر تحديث :الجمعة-29 مارس 2024-04:00ص

صحافة ساخرة


صحافة ساخرة: حديث بين غربان بعدن

الجمعة - 04 أبريل 2014 - 10:43 ص بتوقيت عدن

صحافة ساخرة:  حديث بين غربان بعدن

عدن(عدن الغد)خاص:

الساعة الثامنة صباحا يقف غراب ويدعى "قربوع" على غصن شجرة مريمرة بالقرب من مدرسة "الفجر"  وسط الشيخ عثمان . تمر اللحظات بطيئة في انتظار قدوم صديقه "منتوف" وهو غراب أخر لكنه يقطن بمديرية دار سعد .

عاد قربوع قبل يوم واحد قادما من رحلة قضاها على متن مركب بحرية نقلته الى الصومال حيث عاش هناك لثلاث سنوات واتفق على ان يلتقي صباحا بصديق عمره الغراب " منتوف" وهو صديق طفولة من دار سعد .

 

من بعيد يبدو "منتوف" قادما صوب صديقه "قربوع" وهو يهز جناحيه بتهالك شديد قبل ان يحط إلى جانب صديقه وهو يلهف بشدة . الأجواء حارة وشديدة لكن منتوف يواصل شاقا طريقه صوب صديقه "قربوع"

 

قربوع – مالك صلي عالنبي الساعة ثمانية امانة لله انتظرت لمن ورموا رجولي وانا جالس .. ليش تأخرت ؟

 

منتوف – ياخي خليها على الله بس انت تحسب عدن حق زمان .. خليها على الله بس ذي اليومين علشان تروح الحافة الثاني لازم تحاسب الدنيا قراح من كل جانب .

 

قربوع – ايش في قلقتنا ياخي قدنا من أمس بالليل جالس فوق العودي هذا وقلبي مش مطمئن احس انو عدن ماعاد هيش زي زمان .. مالكم ايش جرى ؟ ايش حصل ؟

 

منتوف – ياقربوع خلينا ساكت بالله .. قد كنت بالصومال مرتاح ايش رجع اهلاتك لوجع القلب،.. عدن ماعاد هيش ديك حق زمان. عدن دي اليومين ازبط قال اخفع .

 

قربوع – الله يستر ياخي أمس بالليل ماخلوناش ننام جالس اسمع قواريح من ناحية الممدارة ايش معهم حرب ولا ايش .. لايكونوا الجماعة خرجوا من عدن .

 

منتوف – ايش من حرب ايش من جماعة ياقربوع تعرف لمن كان ممنوع قراح الطماش بالزواجات الان اسكت لك بس الناس صارت تقرح قنابل وبوازيك  .

 

قربوع – صلي عالنبي ايش تقول طيب وين الأمن وين  الدنيا؟ .

 

منتوف – ايش من امن بيضحكوا عليك ذي اليومين لو معك قنبلة وتشتي تفجرها بعرس فجر وامشي لك.

 

قربوع – الله يستر .. المهم طمنا ياخي كيف المدينة وايش اخبار الناس شوفنا أمس بالليل وصلت جزعت من فوق ساحل أبين اشوف لك الدنيا مطفاية تقول مقبرة حتى اجيت للشجرة هذي ولا لاقيت واحد من اصحابنا زمان .

 

-منتوف :ايوة ياخي الغربان اتهاربوا من الاشجار هاذي ماعاد هيش زي زمان دي اليومين قراح الرصاص والطماش من كل جانب الجماعة هربوا .. راحوا أبين  وفي منهم راحوا لحج .

 

قربوع – ايش هدي الأخبار اللي تفجع .. اقولك كيف المدينة وكيف الناس وايش الأخبار؟

 

منتوف– والله الأخبار ماتشجعش تعرف ماعاد نأمن نخرج مكان تلاقي الواحد جالس فوق شجرة ومايخلوا الناس له حالة الشباب بلا عمل ، الكهرباء طفي لصي ، المي مقطوع وجالسين الناس يجدلونا بحجار قالك حاسين بفراغ واحباط

.

 

قربوع – مش قالوا عملوا ثورة وتغيير ومش عارف ايش ؟

 

منتوف – والله ياخي كل شيء بعدن تغير للاسوأ ..  همببة وفساد وفوضى وكل واحد يحكم نفسو وعدن جالسين يحكموها عشرة مدري عشرين  وكل واحد بهيجة ..روح شوف الشيخ كيف رجعت وساخة بكل مكان وطرق مكسرة بس تشتي الصدق الكداديف وربي مليان بكل ركن كدافة والواحد ماعاد يتعب زي زمان.

 

قربوع – طيب حلو مال عارك تخوفنا .. أهم شيء الاكل متوفر كانوا زمان يجرجونا للمحراق علشان تلاقي لقمة .

 

منتوف – ايوة ايوة بهذه والله "وحيد رشيد" مش مقصر لف لك جمب الشجرة هاذي بتلاقي كدافة الله يقول الحق المحافظ مش مقصر بس ياخي الغربان هربوا بسبب القراح ، تعرف "حمودي" صاحب كشك التمبل بسوق الصيد.

 

-قربوع – ايوة داك الولد الرابخ ؟ مسكين ايش أخباره ؟

 

- منتوف – ايش من مسكين ايش من رابخ الرجال قد معو سلاح إلي وجالس يبيع "حبوب"  وكل ليلة جالس يقرح رصاص من شق وطرف .

 

قربوع – صلي عالنبي ايش من حبوب تقصد (مخدرات )؟

 مادة خاصة بصحيفة عدن الغد يمنع نقلها 

منتوف- ايوة مخدرات مالك مش عارف انته .. يبيعوا طريق طريق .. اقولك عدن ماعاد هيش زي زمان .

 

قربوع – صلي عالنبي طيب وين الحكومة وين الناس مايتحركوش يحموا الشبيلة ؟

 

منتوف – مافيش حكومة لو معك حشيش باتبيع ابوه عيني  عينك ؟ تصدق ياقربوع هيا حمودي هذا كان يحشش ويجي أخر الليل يقزع بالالي حقو الغربان اللي بالشجرة هاذي ، قتل لك نصف الحافة ، تعرف الغرابي مسعود مرشوش .

- قربوع – ايوة ماله طيب وابن ناس ؟

 

  - منتوف – هيا مسعود قتل على يد "حمودي" كذا بطرة  قبل خمسة شهور تقريبا ، روح مسعود تعبان واخذها نومة فوق هذي الشجرة واجاء حمودي قرح راسه .

 

-  قربوع – لاحول ولاقوة الابالله ايش هاذي الأخبار .. وعياله وين وزوجته .

-    منتوف – اسكت لك بس زوجته شلت عياله وحلفت تروح تسكن جمب إدارة الأمن بتارق (طارق) نعم الدنيا هناك امان ، شلت البقشة وسكنت بجولة الزراعة قدام الأمن ، يومين إلا واجاء انتحاري فجر لك سيارة وراحت فيها هي وعيالها .

 

-        قربوع -الله يستر ايش هذا كل هذا يحدث في عدن ؟

-        منتوف - اسكت لك بس ياقربوع قدنا اقول ايش رجع اهلاتك ؟

 

-        قربوع – تصدق جبت لي الظمأ بسبب اخبارك هذي ؟ قم بانروح نشوف إي قصبة مكسورة بانشرب وبنرجع .

 

-        منتوف – اجلس لك بتلاقي المي مقطوع الان المي مايجيش إلا بالليل وبالنادر لاتتعبش نفسك انتظر باشوف لك بعدين من إي زغط .

 

-        قربوع – قلي ايش اخبار الكهرباء معكم أمس بالليل شفت السراجات هذيك اللي كانت تعمينا بالليل جمب الشجرة طافية .

 

-    منتوف – اما هذي الحمد لله لو كان مافيش قراح كان بيكون النوم على كيفك شفت هذيك الكامبات اللي كان ضوئها مايخليك تنام وشغالة بكل شارع هي هذي اليومين بتلاقي كامبة كامبة بعدن تشتغل الحكومة طنشت وماصلحتش حاجة  واحنا ارتحنا بس لو باقي يوقفوا القراح بيكون نوم على كيفك، شوف الله يقول الحق في اشياء عملتها الحكومة حلوة بس ارجع واقولك القراح بس ولا كل شيء تمام .

 

-        قربوع _ طيب والمظاهرات .. عاد باقي حد يتظاهر؟ ولا خلاص الناس تشتي انفصال ولا بطلوا .

 

-    منتوف – المظاهرات طريق طريق ماتشوفش الاعلام بكل مكان بس ياخي مكانهم يقرحوا روسهم هنا بعدن ، قبل بيجي اسبوعين وقع لك قراح روس بساحة العروض .. نعم قال وحيد رشيد ممنوع يتظاهروا ..

-        قربوع – طيب والجفري ايش يقول ؟.

 

-    منتوف – ايش من جفري الله يرحم ايامه وايام الشعيبي اقولك جابوا واحد اسمو "وحيد رشيد" من أصحاب الإصلاح على كيفك لاكهرباء لا مي ولا طرقات ولا إي حاجة قسما بالله لو بس يبقى الرجال سنتين بانلاقي بيوت ياقربوع ، الناس بيهجوا .

-        قربوع – طيب ايش رايك نقوم نروح جمب مدرسة 30 نوفمبر بانشوف صاحب العتر ..خرمان عتر وربي.

 

-    منتوف – اسكت لك بس صاحب العتر ماعاد يجيش زي أول قدام المدرسة هذي اليومين المدارس اصبحت لعب "كبة" الطلاب ماعاد يدرسوش أخر السنة الله يخلي المغلس الغش يقع بوااااااااااار، علشان كذا صاحب العتر بتلاقييوا بسوق القات كل الطلاب هناك وقريب محلات الاتاري وهناك صعب توصل .

 

-    قربوع – ياخي اهلكت اهلي اخبار زي وجهك .. طيب ياخي ايش رايك نروح العصر  الحبيشي وربي اشتقت اشوف مباراة كرة عدنية كذا حلوة ؟

 

-        منتوف – ياقربوع صلي عالنبي ايش من كبة ماعاد فيش حد يلعب كبة.. الناس جالسة تجري بعد الكهرباء والمي ماعاد فيش نفس لحاجة .

 

-    قربوع – طيب ايش رايك نروح العصر ساحل أبين قدها فرصة نشم هواء ونشوف العوايل والناس وبنلاقي لنا شوية فوشار وشاهي وهات لك يادندنة .

 

-        منتوف -  ايش من ساحل أبين قد كسروا اموه كسار رجعوه موقف سيارات ومخزنين وهبالة اسكت لك بس ماعاد فيش من هذا كلو .

-        قربوع – ياخي صلي عالنبي انا اجيت عدن ولافين ؟

-    منتوف – والله اجيت عدن بس عدن خلاص ماعاد هيش عدن زي زمان .. رجعوا امها قرية ياقربوع تصدق والله إننا رحت صنعاء قبل اسبوعين والله عايشين زي الفل ايش الجسور وايش الدنياء.

 

-    قربوع – إيش من صنعاء ايش من هباب اسالنا انا اللي اجيت من "مقديشو" لو تشوف الناس عايشين كيف هاذي اليومين ، الأمن والأمن اكلين شاربين وعادهم فوق كذا كلو كل عصر جمعة يعملوا حفلات رقص وليوه بساحة الجندي المجهول بمقديشو .

 

-        منتوف – ايش هذا بالصومال مش قالوا حرب ؟

-    قربوع – ايش من حرب والله مافي حرب إلا عندكم انتم ؟ الناس هناك عايشين فل الفل والجماعة هنا مكنوكم باتهجعوا ولا بانرجعكم زي الصومال ، والله أنهم عايشين احسن منكم بعدن .

-    منتوف – والله ياقربوع نحن الغربان مالنا دخل بالناس خلينا بعيد الناس بعدن ساكتين احنا ايش دخلنا خلينا نتقرص على بطوننا بالسكتة .

-        قربوع – ياخي لا والله انا بصراحة مابقدرش اعيش هنا برجع لي مقديشو باتجي معي ؟ قم والله باعيشك احلى عيشة .

-        منتوف – معك معك ياقربوع مقديشو مقديشو

يغادر منتوف وقربوع مدينة عدن على متن قارب صغير صوب الصومال .

"انتهى".