قصة من عدن: يوزعوا راشن

بتكتم شديد وتعتيم اعلامي تقوم إحدى المنظمات الاغاثية العاملة في عدن بتسجيل الأسر مع اخد البصمات ومنحها بطاقة استلام مخصص شهري من المواد الغذائية واليكم القصة..
------------------
التقينا بعد صلاة الفجر انا والحاج سعيد لنشرب الشاهي في المقهى كعادتنا ودار الحديث عن الراشن الذي تصرفه منظمة اغاثية في الشيخ عثمان

بعد استماعه للحديث قفز الحاج سعيد قائلا : كذاب عارهم هاذولا صعاليك يبهدلوا بالناس..
قلت له : ها..أنت رحت
ياحاج وسجلت وماقلت لي رد بسرعة : أيوه رحت واتبهدلت وضعيت الحرمة واتسوت لي مشاكل..
قلت : كيف ؟ قال : رحت قبل صلاة الفجر اسجل حسبما قال لي صاحبي علشان الزحمة واللجنة تحضر بعد التاسعة وعليك احضار حرمتك وعارك واعز ماعندك مع شهادات الميلاد وشهادة الزواج وشهادة لا اله الا الله..

المهم شليت الوثائق والحرمة ورحت السابعة صباحا اطبر بعدما سجلت اسمي الفجر في مدرسة خلف ثانوية بلقيس في الشيخ عثمان..

اول ماوصلت شفت امة لا اله الا الله متجمعين وزحمة وصراخ وبلطجة، قلت : ياليد خلي الحرمة مع الحريم وانت داهف لما توصل كان اللي معه ورقة التسجيل يصيح باسم واحد ينطوا له عشرين يداحشوا ويداهفوا فوضى ومسخرة وقلة حياء..

بعد ساعتين تعبت وقررت اروح والراشن لهم وللجن قول ياصاحبي شليت نفسي ومشيت حبه حبه لما وصلت الحافة واصحاب الحافة يسألونا : خير فين الراشن؟ وانا اعرعر للحكومة ومنظمة الاغاثة..

فجأة وانا اعرعر ذكرت الحرمه نسيتها في طابور الحريم..
رجعت اجري للمدرسة ادور للحرمة واصيح : يا أم علي..ياأم علي.. ولالقيتها اصلا مليان حريم..
لقانا واحد ابن حلال قال :
ياحاج في حرمة دوخت ونقلوها لداخل المدرسة قلت : أيش أم علي رجعت تدرس جريت للصف لقيتها تبكي والعباية مبلولة من كثرة الماء اللي رشوها أصحاب المطافي قصدي الحريم تقول حرقت شافتنا أم علي زيدت بالبكاء قالت : الان جيب سيارة وروح بي الله يشلك انت والراشن حقك كنت باأموت..
قلت لها : امشي قليل الى خارج المدرسة بانركب أنجيز ..

خرجنا وروحنا بسيارة بألف ريال..هذه ابا منظمة إرهابية مش اغاثية والراشن خليهم يشبعوا به..
قلت له : هذا الا جعث وتنكيل بالمواطنين مو جابو دا كله تبصيم وشهادات ووثائق وحضور الأسرة كلها ليش ما فيش معاهم طريقة حضارية لتسجيل الناس وحفظ كرامتهم..
قال الحاج : يشتوا يذلوا ابناء عدن ناس حاقدين هائل سعيد سجل الناس في عدن كلها عبر لجان نزلت البيوت ولامن شاف ولا من درى هاذونا تقول له : ابي معوق يقول لك : مالي دخل جيبه والله أننا شفت معوقين على كراسي متحركة بين الناس في الزحمة..

قلت : عادنا كنت باروح بكرة اسجل خلاص ماعاد اشتي راشن وعلى قولتلك يشلوه لهم وللجن..!!