حكاية عتيق وفوزية

عتيق جالس بالبيت ضبحان وبغران ومُخزن قات من حق أمس بقى معه قليل وجالس يقلعب القنوات والفيس لعل وعسى يحصل خبر على المشاهرة متى باتجي مع دخلة فوزية البيت بعدما راحت تواتي ويدور بينهم هذا الحوار:

عتيق: هاا زينب طيري رجعتي من المُواتيه حقك ؟ مالك اتأخرتي برع وولا هامك أنه معك زوج فوق رأسه كل المصايب وحالته حالة وأنتي ولا عندك دقة, مش كفاية قد نحنا بلا بيس والجهال بلا ثياب عيد والبيت مافيبوش راشن..!!

فوزية: أيوه روحت يا لكيع .. مكانك لسانك مُتبري منك, كون أول اسأل فينني كنت وأيش عملت بعدين أتلاكع, وهاا بعد الجوال من قدام عيونك تقوم تعتمي من كثر الهدرة بالفيس والواتس, أني مش عارفة تهاوز من من كثر الهدرة للفجر..؟!!

عتيق: مو من مهوازة يا حرمة, جالس أتابع الأخبار وأشوف متى الزفت الحكومة با تجيب البيس ومتى با تنتهي الحرب اللعينة هذه, وبعدين أنتي فين با تكوني يعني..!! عند الملكة اليزابيث ..؟!! مافيش غير صحباتك جميلة وصفية ومافيش معاكم غير الحشوش على خلق الله, قده هي ذي مهرتكم..

فوزية: هاا عتيق لكنك بطل شوف تهدر على صحباتي, مافيش أحسن منهم ومحد يقوم معيه وقت هالله هالله الا هم التنثين مش زي أصحابك اللي لا ينفعوا ولا يستنفعوا وقت الحاجة.

عتيق: طيب دحين بطلي اللوك حقك وقولي لي أيش الخبر, جابوا المشاهرة والا سمعتي أي خبر من ذي الحكومة اللي من حق أم الصبيان وولا هي دارية بحالة الناس وكيف بايسووا مع العيد..؟!!

فوزية: شوف أني سألت جميلة وهي كلمت زوجه اللي يشتغل في البريد وقال نعم باليومتين ذي بايجيبوا, بس مراعين للموافقة حق الله يشلهم ويزيلهم الإماراتيين اللي ما رضوش يعطوا للطائرة حق البيس رخصة تنزل المطار, والأوادم مساكين حالتهم حالة ومراضيح قدام البريد وكاليوم من ذه الحال..

عتيق: على قولتك طلعوا كلاب وجالسين يتحكموا بمقدراتنا ويتطابزوا بمشاكلنا وما يشتوا يستقر لنا حال الله يقلعهم, طيب دحين خليك الهُدار الزايد وقولي لي كيف بانسوي بهذا الوضع النكد ونحنا ولا معانا ريال وما عرفت من فين أدبر حق ثياب العيد حق الجهال, قده الكبش السنة ذي قرح جو على الأقل أشتي أجيب للجهال ثيابهم..!!

فوزية: أسمع عتيق أني كلمت جارتنا تشوفلي سلف من عند أي واحد وبا نسدد لهم لما تجي المشاهرة حقك وربنا يعين .. هاا كيف تشوف..؟!!

عتيق: طيب خليهم يجيبوا وربنا المخارج الله يزيله حكومة خلت نحنا بالوضع ذ هزي الطلابين, أنا شوفينا قدنا رجعت زي فقير الجمعة لا عليا ولا معي على قولة محمد جمعة خان.

فوزية: ربك كريم يا عتيق خليها على الله با تفرج من عنده, أما ذي الحكومة وشلتهم با يكبع بهم ربي كبعة بوري في نار جهنم زيما يتظلموا بالناس زي هذه الأيام وعاده ذاك رئيس الوزراء حقهم يتبجح ويقول با تصلح الحالة وبا نرجع عدن وبا تدور عجلة التنمية..!! مو من تنمية الله يزيله والتاير حقه مُبنشر ما لاقيناش اللبه الروتي نأكله وقلك عجلة جدتي..!

عتيق: أيوه والله صدقتي يا فوزية والله عمرنا ما مرينا بهذا الحال من زمان الزامنين, حتى لما كانت تقرح عندنا حروب, كانت الحكومات السابقة المشاهرة حق الناس وحقوقه ما تسافط فيبيش..

فوزية: أجينا على وقت من حق أم الجن يا عتيق وحكام ومسئولين وقيادات حق بطونهم بس وطز بأبوا الشعب خليه يحرق بجاز..

عتيق: دحين أنتي بس أدخلي عند الجهال وراضيهم قليل مساكين قدهم يبكوا من أول لما سمعوا مافيش فلوس ومابا يلبسوش ثياب العيد..

فوزية: طيب ولايهمك أني باراضيهم حبايب قلبي.

عتيق: أسمعي فوزية شوفيلي اذا عاده القات حق اول أمس هله بالبرتن والا خلص, خلينا أبارح فيبه مع حق أمس قد أجالي الطاروو والله من كثر المشاكل اللي فوق رأسي..

فوزية: إيييه قدك نسيت وا عتيق مش أمي أجت عندنا أمس وأنت قمت هبيتله.

عتيق: أووه أيوه والله نسيت, الله يسامحه امك ذي كمان تشم القات شموم.

فوزية: ويه عتيق شوف أحسلك لا تذكر أمي على لسانك الا بخير بلا لوك حقك.

عتيق: مو من خير وهي قرطت العوديين من حق أول أمس اللي كنت با سبر فيبهم اليوم.

فوزية: لا تنسيش يا عتيق انه أمي ذي اللي ما تعجبكش كيف تقوم معك وقت اللزوم , ولاتنسيش لما تخزنك لما تكون طفران.

عتيق: أيش دحين با تعايرونا أنتي وأمك بالحبتين القات الشُطف اللي كانت توصيهم مع أخوك لما تعصرنا بطني منهم..

فوزية: هاا قده القات حق أمي شُطف, ومنه اللي كان يتطهوشهم مطاهشة لما يشوفه..؟!!

عتيق: مليه قدنا أخزنه كُلف يا حُرمة جعلك ازالة أنتي وقات أمك ذاك.

فوزية: بس بالله كيه خلي لي حالي دحين من الهدرة الفاضية حقك خليني أروح أشوف الجهال.

عتيق: أووه والله قطعوا لي قلبي والله وانا مش قادر أعمل لهم حاجة, العين بصيرة واليد قصيرة, لعنة الله على اللي ذلوا نحنا في بلادنا ربنا يفرجها علينا ويقلع أبوهم هم والحكومة بيوم واحد.

أنتهى ......................

تأليف بلال غلام حسين

30 أغسطس 2017م